Review
နောက်ဆုံးတော့ သုံးနှစ်တာကာလအကြာမှာ Squid Game Season 2 ထွက်ရှိလို့ လာပါပြီ။
ပရိသတ်တွေအနေနဲ့ Season 1 ကနေ ရင်းနှီးပြီးသား မျက်နှာတွေကို မြင်တွေ့ရမှာပါ။ Lee Jung Jae, Lee Byung Hun, Wi Ha Joon, နဲ့ Gong Yoo တို့လို သရုပ်ဆောင်ကြီးတွေအပြင် Im Si Wan, Kang Ha Neul, နဲ့ Park Sung Hoon တို့လို လူသိများပြီး ပရိသတ်အချစ်တော် သရုပ်ဆောင်တွေလည်း ပါဝင်အားဖြည့်ထားပါတယ်။
Season 2 မှာ ပထမဂိမ်းရဲ့ အနိုင်ရသူ ကစားသမားနံပါတ် ၄၅၆ ဖြစ်တဲ့ ဆောင်းဂီဟွန်း (Lee Jung Jae) ဟာ Squid Game ထဲကို ပြန်လည်ဝင်ရောက်လာပါတယ်။ သူ့ရဲ့ ရည်ရွယ်ချက်ကတော့ တခြားကစားသမားတွေရဲ့ အသက်ကို ကယ်တင်ပြီး ဒီကြမ်းတမ်းတဲ့ ဂိမ်းတွေကို အဆုံးသတ်ဖို့ပါပဲ။
ဒါပေမဲ့ ငွေကြေးအခက်အခဲကြောင့် ဂိမ်းထဲကိုရောက်လာကြတဲ့ ကစားသမားအသစ်တွေကတော့ ဝမ် ၄၅.၆ ဘီလီယံဆိုတဲ့ ကြီးမားတဲ့ ဆုကြေးပမာဏကို မြင်ပြီး ငွေဆိပ်တက်ကာ အသက်ကို မမှုနိုင် ဖြစ်နေကြပါတယ်။
ဒါဆို ဒီရက်စက်ကြမ်းကြုတ်တဲ့ ဂိမ်းထဲမှာ ဘယ်ကစားသမားက နောက်ဆုံးထိ အသက်ရှင်ကျန်ရစ်မလဲ။ ဆောင်းဂီဟွန်းကရော ဒီဂိမ်းကို တကယ်ပဲ ရပ်တန့်အောင် တားဆီးနိုင်မလား။
Season 1 ထက် ပိုမိုပြင်းထန်တဲ့ ဇာတ်လမ်း၊ ဇာတ်ကောင်ပုံစံတွေနဲ့ ရင်တထိတ်ထိတ် ကြည့်ရှုရမှာဖြစ်လို့ လက်မလွတ်တမ်း ကြည့်ရှုလိုက်ကြပါဦးနော်။